Etxea(e)ko Euskararen

Joseba Irazokik sare sozialetan iragarri duenez, irailean, Joseba Irazoki eta Lagunak (JIEL) bandak lan berria plazaratuko du; III izenburua izango diskoak.

Hemen disko berriaren azala eta kontrazala Ramon von Zumitrenko haundiak egiña! Erabilitako materiala zinta amerikana eta esparadrapoa dira. Disko berriaren izenburua: "III".
Aquí la portada y contraportada del disco realizada por el gran Ramón Zabalegi! pic.twitter.com/ycKZAKLNdl

— joseba irazoki (@JIrazoki) August 29, 2021

Irazokik ez du oraindik grabazioaren edukirik zabaldu; ostera, bai zabaldu duela diskoaren azala, zeina Ramon M. Zabalegi diseinatzaileak egin duen. Zabalegik “zinta amerikana eta esparadrapoa” erabili ditu azala egiteko.

Disko berriaren izenburua k adierazten duenez, JIEL taldearen hirugarren lana izango da III: 2014an, taldearen izen bereko diskoa argitaratu zuen laukoteak, eta lau urte beranduago, Zu Al Zara?, zeinak oso harrera ona izan zuen musika zaleen artan, batez ere diskoa zuzenean aurkeztu eta gero.

Irazokiz (gitarra eta ahotsa) gainera, Felix Buff (bateria eta ahotsa), Jaime Nieto (baxua) eta Ibai Gogortza (gitarra) musikariek osatzen dute JIEL.

Honatx diskoan bildutako Ikusezina kantuaren bideoa:

Algortako Bertsolari Eskolak (ALBE) ondutako Balendin Enbeita bertsopaper lehiaketaren 14. edizioa abian da. Lanak jasotzeko epemuga 2021eko irailaren 30a izango da, eta aurkeztutako lanak originalak eta argitaratu gabeak beharko dute izan.

Parte-hartzaileak bi kategoriatan arituko dira: Helduak, 18 urte edo gehiagokoak (8 bertso egin beharko dituzte, eta gehienez 12;) eta Gazteak, 17 urtera artekoak (6 bertso eta gehienez 10). Gaia, neurria eta doinua libreak dira. Nahi beste bertso-sorta aurkez ditzake. Lanak hona bidali behar dira: Balendin Enbeita Xx. Saria. Algortako Bertsolari Eskola (Albe). Martikoena 16, 2. solairua. 48992 Getxo.

Sarien harira, Helduetan hauexek izango dira: 1. saria, txapela, 1.000€ eta garaikurra; 2. saria, 700€ eta garaikurra eta 3. saria: 400€ eta garaikurra. Gazteentzat: 1. saria,  txapela, 300€ eta garaikurra; 2. saria, 200€ eta garaikurra eta 3. saria: 100€ eta garaikurra.

“Balendin Enbeita bertsolari handiak, bat-bateko bertsoak bikain kantatzeaz gain, gogoko zuen bere gustuko gaiari patxadaz idaztea ere. Eta horixe da, hain zuzen ere, orain eskatzen gatozkizuena, hau da, zuen gustuko gaia aukeratu eta bertso-sorta eder bat gogoz idazteko”.

Informazio gehiago, hemen.

2019ko martxoan aurkeztu zuen Tupust! emakume-komikigileen kolektiboak izen bereko antologiaren lehen alea, “komikigintzatik eta euskaraz, eredu tradizional heteropatriarkalaren deseraikitzeko” asmoz.

Estreinako zenbaki hura Txalaparta argitaletxearen eskutik plazaratu izanagatik ere, oraingoan, autoedizioaren aldeko hautua egin dute. Bigarren ahalegin ZU izenburupean aurkeztuko da: “Zu. Bestea. Ni ez den hori. Niaren ardatza, niaren etsaia, niaren osagarri. ZU”.

Bigarren komiki antologia feminista hori aurresalmentan eskuratu daiteke: https://tupust.bigcartel.com/product/tupust-zu-aurresalmenta. Liburuaren bidalketak urriaren hasieran egingo dituzte.

Irakurleak askotariko komiki-estiloak aurkituko ditu zenbaki berri honetan; esaterako, Maite Gurrutxagak Irati Jimenez idazlearen testua ilustratu du, Pedro Salinasen hitzetan oinarrituta eta Susanna Martín-ek komiki autobiografikoa egin du. Ainara Azpiazu Aduriz Axpi, Maite Caballero, Paula Estevez eta Irati Eguren dira liburuan parte hartu duten komikigile eta ilustratzaileak.

Tupust! emakume-komikigileen kolektiboaren helburua komikia eta feminismoa uztartzea da, bai eta egileen arteko sarea osatzea ere. Hala, Tupust! komikiaz gainera, bestelako ekitaldiak ere antolatzen dituzte: hitzaldiak, erakusketak, eta abar.

Antzerki-ekoizpena sustatzeko laguntza plazaratu du Euskaltzaindiak bigarrenez Bilboko Udalaren laguntzarekin. Deialdiaren xedea euskarazko antzezlan laburrak sustatzea da: antzerki-obrek gehienez ere 30 minutu eta gutxienez 15 minutuko iraupena izango dute.

Euskaltzaindiak deialdiaren oinarrietan jaso duenez, “helburu nagusia euskarazko antzerkia hauspotzea da, batez ere, pieza laburren sorkuntzari lagunduz. Horrez gain, hautatutako lana jendaurrean estreinatzeko aukera ere emango zaio sarituari (epaimahaiak hala baderitzo, ekoizpenaren jarraipena egin ostean)”.

Gidoiak bidaltzeko epea 2021eko urriaren 15ean amaituko da, eta sariak hauexek izango dira:

• 700 euroko laguntza gidoiari
• beste 700 euro antzezlana 2022ko LAUTAN HIRU jaialdian estreinatzen bada (epaimahaiak erabakiko du hori, ekoizpenaren jarraipena egin ostean).

Gidoiak bidaltzeko epea 2021eko urriaren 15ean amaituko da. Informazio gehiago, hemen.

Ursula K. Le Guin egilearen The Word For World Is Forest ekarri du euskarara Amaia Apalauzak, Oihan hitzean mundua. Igelak argitaratutako liburua Arrate Hidalgoren hitzaurrearekin eta Iban Zalduaren epilogoarekin osatuko da. Zientzia Fikziozko klasikoa irailaren 1etik aurrera eskuratu ahalko da.

Egile estatubatuarrak Vietnamgo gerraren itzalpean idatzi zuen obra hau; idazleak gatazka beliko horren aurkako jarrera erakutsi zuen. Hartara, liburuak kolonialismoaren eta militarismoaren gaiak aztertzen ditu. Le Guinek berak fikziozko lan batean islatu zuen “adierazpen politikorik argiena” bezala deskribatu zuen.

Hauxe da liburuaren sinopsia: “Kolonizazio bortitz batek athshetarren bizitza baketsua hautsi du. Selver ameslariak gidatuta, azkar baino lehen ikasiko dute haiek ere bortxaren mintzaira, euren munduak biziraunen badu. Nora darama itzulbiderik gabeko biolentziaren hautuak?

1976an argitaratua, Oihan hitzean mundua euskarara itzulitako Le Guin-en lehen liburua da. Estatubatuarra XX. mendeko zientzia fikzioaren maistretako bat da. Igela argitaletxearen arabera, “Taoismoaren, feminismoaren eta humanismo erradikalaren bidetik, gizateriari kapitalismotik at kokatzen diren bizikidetzarako aukerak eskaini zizkion bere lanetan”.

Euskal Idazleen Elkarteak (EIE) bi ikastaro antolatu ditu Euskararen Etxean: Isla gabeko ispiluak: emakumezkoen ahotsaren eraikuntza paperean eta Zientzia fikzio feminista.

Zientzia fikzio feminista Garazi Albizuak gidatuko du, irailaren 22an, 29an eta urriaren 6an egingo da.

Isla gabeko ispiluak: emakumezkoen ahotsaren eraikuntza paperean, halaber, Idoia Carramiñanak zuzenduko du, eta urriaren 16an, 23an eta azaroaren 6an eta 13an egingo da.

Informazioa eta izen-ematea:

eie@idazleak.eus

Aurten ere, TOKIKOM Sariak banatuko dituzte, “toki komunikabideetan egunero-egunero egiten den lan handia aitortzeko asmoz”. Ohiko hiru sariei, azalik, edukirik eta ikus-entzunezkorik onena, aurten laugarren gehituko zaie, komunitatearen saria, “2020ko arrakasta ikusita, komunitatearen saria ere emango dugu, publikoak emandako bozketan oinarrituta”.

TOKIKOM Sarien helburu nagusiak euskarazko toki komunikabideen lana ezagutaraztea eta lan horren balioa publikoki aitortu eta aldarrikatzea da.

Sarietarako proposamenak aurkezteko epemuga  2021eko irailaren 10a izango da. “Sariketan parte hartzeko, ezinbestekoa izango da proposamenak bidaltzea epaimahaiari. Proposamen horiek lanaren egileak berak zein beste medio edo partikular batek aurkez ditzake”.

Proposamenarekin batera, fitxa labur bat bidaliko da, honako datu hauek jasoz:

• Proposamena egiten duenaren izen-abizenak (edo izen soziala) eta kontaktatzeko modua.
• Lana zein saritarako proposatzen den
• Proposatutako lanaren izenburua
• Proposatutako lana zein komunikabidetan eta noiz argitaratutakoa den
• Proposamenaren arrazoiak: zer meritu edo ezaugarri ikusten zaion proposatutako lanari, sariotara aurkezteko.

Hori guztia, hemendik aurkeztu beharko da: https://tokikom.eus/sariak/2021/proposamenak

Sariketaren oinarriei eta baldintzei buruzko xehetasun guztiak, hemen.

Ondarroako Udalak eta Elkar argitaletxeak sustatutako bekaren XXI. edizioa abian da. Saria 6.000 eurokoa da eta lanak aurkezteko epemuga 2021eko urriaren 31 izango da. Proiektuok helbide honetara bidali beharko dira: mrey@ondarroa.eus.

Ana Urkiza, Leire Bilbao eta Xabier Mendigurenek osatuko dute epaimahaia eta 2021eko azaroaren 30a baino lehen iragarriko dute irabazlea.

Antolatzaileeek jakinarazi dutenez, parte-hartzaileek honako hauek aurkeztu beharko dituzte:

a) Landu nahi duen kontakizunaren azalpena, bi mila eta sei mila karaktere bitartekoa, egoki iritzitako ezaugarriak zehaztuz, hala nola, argumentua, egitura, luzera, estiloa, etab.

b) Idazlanaren lagina edo erakusgarria, hamabost mila eta berrogei mila karaktere bitartekoa, ez nahitaez kontakizunaren hasierakoa, baina bai zati bakarra osatzen duena.

c) Egilearen izen-abizenak, helbidea, posta elektronikoa, telefonoa eta nortasun agiriaren kopia eskaneatua. (Egileei buruzko informazioa Udalak gordeko du erabakia hartu arte, eta epaimahaikoek ez dute jakingo haien berri). Hartara, egileak ez du bere nortasuna agerian utz dezakeen ezer idatziko ez laginean ez azalpenean (bidaliko duen artxibategietako ezaugarrietan ere ez). Baztertu egingo dira hori betetzen ez duten hautagaiak.

Informazio gehiago, hemen.

Akademiak, azken sei hilabeteotan, 592 forma berri jaso ditu hiztegian, 427 sarrera eta 165 azpisarrera, tartean, “queer”, “nezeser”, “zaurgarritasun”, “trajeria”, “telelaguntza” eta “heteropatriarkal”.

Sarrera berriak egun erabiltzen diren hitzak dira, izan ere, aurten, forma berriak landu dituzte Akademian; esaterako, pandemiari lotutakoak: “koronabirus”, “asintomatiko”, “berragerpen”, “deskonfinamendu”…

Inguruko hizkuntzetatik hartutakoak ere jaso dituzte: “dumping”, “show”, “gulag”, “portzierto”, “remake”, “smartphone”, “router”, “poney”, “nezeser”…

Berria egunkariko albiste honetan informazio gehiago eskura dezakezue.