Etxea(e)ko Euskararen

Euskararen Etxeak Europako Ondarearen Jardunaldietan parte hartuko du Hostopostoak eta ilargi-jaia ipuinaren kontaketa ilustratuarekin. Ekitaldia Bakioko Txakolingunean egingo da, urriaren 15ean, 11:03ean. Ipuina Miren Agur Meabek idatzi du eta Gastónek ilustratu du, eta biak ala biak Bakion izango, haurren gozamenerako. 5 eta 8 urte bitarteko haurrei zuzendutako ekimena da.

Hau da liburuaren sinopsia: Hostopostoak basoan esnatu dira, baina bat falta da. non ote dabil? tximeleta urduri dago, gaur ilargi-jaia delako eta oraindik ez dutelako afaria prestatu…

• 

Miren Agur Meabek azaldu duenez, hiru helburu ditu ipuinak: “irakurketa jostagarria sustatzea, fantasia elikatzea eta hiriko umeen harreman afektiboa sendotzea euskararen ahozkotasunarekiko”.

Egiturari dagokionez, “egoera harrigarri” batetik abiatzen da kontakizuna, gero, gatazka bat gertatzen da, eta amaiera irudimentsu batekin amaitzen da.

Horretarako, hizkuntzaren “esperientzia poetikoa” baliatu du, “hizketa xume eta baliabide poetikoen” bidez”. Sinonimia ere agertzen da. “Esaterako, `hosto pila´ pertsonaien ohea da, baina, nagusiok dakigunez, `hostopila´ hojaldrea ere bada. Hala, pertsonaiek hostopila egin beharko dute hostoekin eta errezeta eta osagaiak bilatu”.

Bakioko ekitaldian parte hartuko duten haur guztiek ipuin bana jasoko dute doan. Halaber, salgai egongo da, 5 euroren truk.

Izena emateko, deitu telefonoz, 94 402 80 81 (astelehenetik ostiralera, 8:00-20:00) edo bidali mezua, info@euskararenetxea.eus

Euskararen Etxeak, Bilboko San Ignazio auzunean, gure hizkuntzaren inguruan topalekua, lan kooperatiborako zentroa eta laborategia izatea du helburutzat.

Euskararen Etxeak Liburuaren arbola erakusketa ibiltaria prestatu du, Bizkaiko Foru Aldundiko Euskara, Kultura eta Kirol Sailarekin lankidetzan, bost herri hauetan ikusiko dena: Portugaleten, Ondarroan, Getxon, Amorebieta-Etxanon eta Gernikan, 2022ko irailean hasi eta 2023ko otsailean buka.

Gorka Arrese editoreak apailatu du erakusketa, eta hitzaldi bana egingo du udalerri horietako bakoitzean.

Erakusketaren inaugurazio ekitaldia

Eguna: irailak 20

Lekua: Portugaleteko Gazte Gelan

Ordua: 12:00etan

Partaideak:

• Lorea Bilbao Euskara, Kultura eta Kirol Saileko foru diputatua
• Iurdana Acasuso Euskararen Etxeko ordezkaria eta Azkue Fundazioko zuzendaria
• Txema Ezkerra Portugaleteko alkateordea eta Gazteria zinegotzia
• Koldo Nuñez Portugaleteko Udaleko Euskara zinegotzia
• Gorka Arrese editorea eta erakusketaren diseinatzailea.

Boise State University-k Diaspora Eguna Mintzagai online topaketa antolatu du Euskal Diasporaren Egunean.

Euskalkultura.eus webgunan jasotzen denez, “Euskal kulturaren alorra landu eta euskal ikasketetan interesa duten pertsonek har dezakete parte. Topaketak aukera ematen die graduondoko ikasleei euren lanak agertzeko eta erakundeei euren berri eman eta lantzen ari diren proiektu eta emaitzak jakinarazteko. Euskal Ikasketen alorrean dabiltzaten guztiei dago zabalik eta partaidetza hizlari gisa izan daiteke ala entzule moduan. Ikasleen aurkezpenak hiru minutukoak izango dira, hiru minutuko tesi ereduari jarraiki, eta erakundeetako hizlarienak, bostekoak”

Data: 2022ko Irailaren 8an, Diasporaren Egunean

Antolatzailea: BSU, Boise State University, Euskal Ikasketen alorra

Ordua: Boise, 8:00etan, Buenos Aires, 11:00etan, Euskal Herria, 16:00etan

“57. Durangoko Azokako izen-emateak irailaren 1ean zabalduko dira. Hiru izen-emate zabalduko dira: partaideek erakusmahaiak alokatzeko, kultur sortzaileek egitaraurako proposamenak aurkezteko eta ikastetxeek ikasle goizeko tailerretan parte hartzeko”, jakinarazi du Durangoko Azokak bere webgunean.

• Abenduaren 7tik 11ra egingo da aurtengo edizioa.
• Erakusmahaiak alokatu eta egitarauko proposamenak aurkezteko epea irailaren 1ean abiatuko da eta www.durangokoazoka.eus webgunean egin beharko da.
• Ikastetxeek Ikasle Goizeko tailerretan izena emateko epea irailaren 1ean zabalduko da.
• Online denda mantendu egingo da.

Informazio gehiago, hemen.

Euskal literatura sarean hedatzen duen Booktegik jaialdia ondu du Usurbileko Sutegi Kultur Etxean urriaren 22an, plataforma digitalaren bosgarren urteurrena ospatzeko asmoz. Horrekin batera, bazkideak lortzeko kanpaina abiatu dute.

Egun horretan, besteak beste, kontzertuak, hitzaldiak eta solasaldiak izango dira goizetik iluntzera arte. Hala, Anarik Habia diskoko kantuak joko ditu -disko horretan oinarritutako arte erakusketa ere ikusgai izango da-, eta Uxue Alberdik eta Amorantek ospakizunerako propio prestatutako emankizuna aurkeztuko dute, Meza Nagusia.

Halaber, idazleen partaidetza handia izango da egun osoan ; tartean, Asel Luzarraga, Edorta Jimenez, Maite Darceles, Danele Sarriugarte eta Bakartxo Iguaran.

Horretaz gainera, Iraia Eliasek eta Hatxek Harkaitz Canoren Azken aurreko manifestua antzeztuko dute, eta Itxaro Borda anfitrioi lanetan arituko da, Xabier Strubell musikariaren laguntzaz. Informazio gehiago, Argia astekariaren webgunean aurki dezakezue.

Azkenik, bazkideak lortzeko kanpaina ere abiatu du Booktegik: “Gure helburuarekin bat egiten duen edozein izan daiteke bazkidea. Hau da, euskaraz idazteko eta irakurtzeko zaletasuna bultzatzeko gogoz dagoen edozein. Batez ere, euskararen aldeko ekintza da Booktegi, eta aurrerantzean ere dena dohainik eskaini ahal izateko eskatzen diegu laguntza”, azaldu du Aritz Branton Booktegiko arduradunak Berria egunkariak oraintsu argitaratutako elkarrizketan.

Iaz abiatu zen lehendabizikoz Euskarazko kultur ekitaldien sorkuntzarako Hi(ZKI)bridoak laguntza. Laguntza hori Mejillon Tigre taldeak jaso zuen, Hitz Esana proposamena garatzeko. Ikuskizun hori, hain zuzen, Hi(ZKI)bridoak kultur zikloaren hirugarren edizioaren baitan aurkeztuko da, azaroaren 10ean, Bilboko Berreginen Museoan.

Aurten, halaber, Euskarazko kultur ekitaldien sorkuntzarako Hi(ZKI)bridoak laguntzaren bigarren deialdia abiatu du Euskararen Etxeak. Laguntza horrek 3.000 euroko saria bideratuko du 2023ko Hi(ZKI)bridoak zikloan estreinatuko den ekitaldi bat garatzeko.

• Euskarazko kultur emanaldi berriak sortzen laguntzea eta ezagutaraztea eta disziplina eta adierazpide desberdinetako sortzaileen arteko elkarlana sustatzea eta indartzea du helburu Hi(zki)bridoak laguntzak.
• Euskara hutsezko kultur emanaldi berri baten gidoia eta emanaldia bera sortzea eta garatzea. Aukeratutako lanaren lehenengo emanaldia 2023ko Hi(ZKI)bridoak kultur zikloaren baitan eskaini beharko da. Emanaldiak formatu txikian egiteko modukoa izan beharko du eskatzen da.
• Hautatutako lanak 3.000,00€ko ordainsaria jasoko da.
• 2022ko azaroaren 14an amaituko da lanak aurkezteko epea.
• Epaimahaiak abenduaren 19an emango du hartutako erabakiaren berri.

Bost kidek osatuko dute beka honetako epaimahaia: Eneko Sagardoy aktoreak, Lutxo Egia idazleak, Haizea Barcenilla arte-kritikariak, Onintza Enbeita bertsolariak eta Iurdana Acasuso Azkue Fundazioko zuzendariak.

OINARRIAK, hemen.

Poltsiko Antzerkiaren alorrean euskarazko sorkuntzak sustatzeko XIII. deialdia abiatu du Donostiako Udalak. Egitasmoak aurkezteko epea 2022ko uztailaren 4an hasiko da eta irailaren 16an amaituko da.

Bi egitasmo aukeratuko dira: irabazleak 1.500 euro jasoko ditu; finalistak, berriz, 1.200 euro. Saritutako lanak hurrengo Poltsiko Antzerki Jaialdiaren barruan estreinatzeko eta antzezteko konpromisoa hartuko dute irabazleek eta finalistek (4 emanaldi bakoitzak).

“Proiektu irabazleak 2.500 € jasoko ditu (gordinak eta zergak barne) Poltsiko Antzerki Jaialdian egin beharreko lau emanaldien truke. Finalistak 2.000 € (gordinak eta zergak barne) jasoko ditu. Gainera, sormen-proiektuak gauzatzeko, kultur etxeek abenduan zehar espazioak utziko dituzte aukeratutako antzezlanak muntatzeko”.

Poltsiko Antzerkiaren Jaialdia formatu txiki eta ertaineko antzerki-ikuskizunen erakustaldia da, eta urtero egiten da Donostiako auzoetako taberna eta lokaletan.

Informazio gehiago, hemen.

• 

Euskararen Etxeak ondu ohi duen Hi(ZKI)bridoak kultur egitarauaren hirugarren edizioa irailaren 22an hasiko da Petti musikariak eta Ana Galarraga zientzia-komunikatzaileak aurkeztuko duten Frankenstein agurgarria ikuskizunarekin. Emanaldia 19:00etan abiatuko da, eta Bilboko Berreginen Museoan egingo da, Euskararen Etxean izango diren obrak tarteko.

Frankenstein agurgarria Victor Frankensteini zuzendutako gutun baten irakurketa da.  Ana Galarraga zientzia-komunikatziale eta kulturzaleak sortu du testua, eta hainbat arlo biltzen ditu, besteak beste,  zientifikoa, etikoa, feminista eta literarioa. Petti musikariaren laguntzarekin errezitatzen du testua.

“Orain dela 200 urte baino gehiago idatzi zuen, garai oso nahasian, eta paralelismo handia dauka, gauza askotan, garai hark gaur egungo giroarekin eta kezkekin, esaterako: gizateriari buruzko kezkak, beldurrak, autoritarismoa, ingurumena, zientziaren aurrerapenek sortzen dituzten zalantza etikoak… Horiek guztiak Mary Shelleyren garaian bazeuden, liburuan ondo jasota daudenak, baina gaur egun kezka horiek gure gizartean ere badaude; hortaz, ikuskizunarekin dugun helburua, batetik, liburuaren izpiritua gaurkotzea da, Victor Frankenstein pertsonaiarekin eta gutun bidez kontatuz, eta, bide batez Mary Shelleyren figura eta lana aldarrikatzea eta lehen planora ekartzea ere bai”, dio Ana Galarragak iragan apirilean goiena.eus webgunean argitaratutako elkarrizketa batean.

• 

Bere garaian euskaldunon artean sekulako arrakasta erdietsi zuen lehiaketa udazken honetan itzuliko da ETB1era, hain justu, irailean, eraberrituta baina orduko esentzia mantenduz.

“Euskaldunontzat erreferente bilakatu zen lehiaketa udazken honetan itzuliko da ETB1era, eraberrituta baina orduko arima galdu gabe”, iragarri du EITBk.

Orio Produkzioak ekoiztetxeak egingo du saioa, eta ETBko programazio berriarekin batera estreinatuko da Mihiluze lehiaketa udaren ondotik. Astelehenetik ostegunera ikusi ahal izango da, 21:30etik aurrera ETB1en eta eitb.eus-en.

“Ehundaka izan ziren Mihiluze saioan parte hartu zuten lehiakideak eta sekulakoa izan zen euskaldunongan utzi zuen arrastoa. Tribuaren berbak, Imintzioka, Esamesak… bezalako proba ezagunak ikusiko ditugu berriz, baina guztiz eraberrituak. Lehiaketa entretenitua, jostaria eta umoretsua izango da; ondo pasatzeaz gain, irribarre batekin ikusteko moduko saioa. Edonola ere, tentsioa ez da faltako, batez ere saioak aurrera egin eta zakua irabazteko aukerak handitu ahala”.

Lehiaketan parte hartzeko, mihiluze@orioprodukzioak.eus helbidean edo 660991766 telefono zenbakian edo WhatsAppean eman beharko da izena. Lehiakideak aukeratzeko castingak udan hasiko dira.

Informazio gehiago, hemen.