Etxea(e)ko Euskararen

Euskal letren udazkeneko hitzordu  nagusia da Literaturia, zeina Zarautzen egingo den irailaren 24tik 26ra. Lutxo Egiak irakurriko duen manifestuarekin hasiko da aurtengo edizioa, Modelo Aretoan, 20:00etatik aurrera. Idazlearen hitzen ondotik, Asisko Urmeneta marrazkilariaren Sugarren mende komikian oinarritutako antzezlana estreinatuko dute.

Larunbatean beste estreinaldi bat izango da: Gotzon Barandiaran idazleak eta Tapia musikariak azokarako propio egin duten Apoaren itzala. Larunbatean izango diren beste jarduera batzuk hauexek dira: Zientzia fikzioa Euskal Herrian eta Saiakera itzultzeaz mahai inguruak. (H)ilbeltza Euskal Nobela Beltzaren Astea ere omenduko dute zapatuan.

Igandean, besteak beste, Galtzagorri Euskal Haur eta Gazte Literatura Elkartea omenduko dute eta Iñigo Astiz kazetari eta idazleak eta Jon Basaguren musikariak Oraindik, orain, oraingoz ikusgarria aurkeztuko du, zeinak musika eta poesia uztartzen dituen.

Ohikoa den legez, liburu aurkezpenak, liburu-azoka eta umeentzako tailerrak izango dira.

Informazio gehiago, hemen.

Artedrama Euskal Laborategia (ADEL) ondu dute aurten ere Aulestin, hilaren 20tik 25era bitarte. Antzerkigintzan eta bestelako arte eszenikoetan euskaraz aritzen direnentzako lantegiak dira.Euskal aktore, zuzendari, antzerkigile eta antzerkizaleentzat urtero egiten den topagunea.

Aurten, Ander Lipus, Olatz Gorrotxategi, Patricia Urrutia, Matxalen De Pedro, Igor de Quadra, Ruth Guimerà eta Manex Fuchs-ek zuzenduko dituzte Aulestiko saioak.

Artedramaren arabera, “Euskal Herriko arte eszenikoetan murgilduta gaudenon arteko eztabaidak, jakintza eta elkartrukeak sustatzeko asmoarekin, astelehenetik larunbatera, 48 orduz guztira, sei irakasleren tailerrak prestatu ditugu”.

Bada, urtero legez, “Aulesti herria euskal antzerkiaren irla bilakatuko da, eta herriko txoko guztietan zabalduko da antzerkiaren lurrina eta aste batez hau usaindu eta berarekin jolas egiteko beta izango dugu”.

Informazio gehiago, hemen.

Irailaren 23an hasiko da Hi(ZKI)bridoak kultur egitarauaren bigarren edizioa Euskararen Etxean. Egun horretan Ibon RG eta Enrike Hurtado musikariek Joxan Artzeren ondaretik abiatutako oMOrruMU baMAt ikuskizuna aurkeztuko dute. Gonbidapenak Hamar egun lehenagotik eskuratu ahalko dira, alegia, irailaren 13tik aurrera. Telefonoz (94 402 80 81) edo Euskararen Etxean bertan, betiere daten barruan.

EKITALDIA	GONBIDAPENAK	EMANALDIA
oMOrruMU baMAt	Irailak 13	Irailak 23
Dendaostekoak	Irailak 27	Urriak 7
Mirande	Urriak 19	Urriak 29
Zientzia Fikziozko Bertso saioa	Urriak 30	Azaroak 11
Anari	Abenduak 7	Abenduak 17

Iaz abiatu genuen lehendabizikoz Hi(ZKI)bridoak. Literatura Mutanteak kultur zikloa, zeina literaturaren eta ahozkotasunaren inguruan ardazten den. 2020. urtea oso gorabeheratsua izanagatik ere, egitarauak oso harrera ona izan zuen kulturzaleen artean. Hartara, bigarren edizioa egingo dugu 2021eko irailetik abendura, Euskararen Etxean.

Horrekin batera, aurten Euskarazko kultur ekitaldien sorkuntzarako Hi(ZKI)bridoak laguntza jarri dugu martxan estreinakoz. Laguntza horrek 3.000 euroko saria bideratuko du 2022ko Hi(ZKI)bridoak zikloan estreinatuko den ekitaldi bat garatzeko.

• Euskarazko kultur emanaldi berriak sortzen laguntzea eta ezagutaraztea eta disziplina eta adierazpide desberdinetako sortzaileen arteko elkarlana sustatzea eta indartzea du helburu Hi(zki)bridoak laguntzak.

• Euskara hutsezko kultur emanaldi berri baten gidoia eta emanaldia bera sortzea eta garatzea. Aukeratutako lanaren lehenengo emanaldia 2022ko Hi(ZKI)bridoak kultur zikloaren baitan eskaini beharko da. Emanaldiak formatu txikian egiteko modukoa izan beharko du eskatzen da.

• Hautatutako lanak 3.000,00€ko ordainsaria jasoko da.

• 2021eko azaroaren 22ean amaituko da lanak aurkezteko epea.

• Epaimahaiak abenduaren 20an emango du hartutako erabakiaren berri.

Bost kidek osatuko dute beka honetako epaimahaia: Eneko Sagardoy aktoreak, Lutxo Egia idazleak, Haizea Barcenilla arte-kritikariak, Onintza Enbeita bertsolariak eta Iurdana Acasuso Azkue Fundazioko zuzendariak.

OINARRIAK, hemen.

Irailaren 8an Euskal Diasporaren Eguna ospatuko da. Hori dela eta, Euskararen Etxeak bere ekarpena egin nahi du: irailaren 8an, Euskararen Interpretazio Zentroaren online bisita egokitua abiatuko dugu diasporako Euskal Etxeetako kideentzat. Zerbitzu hori gure eskaintzaren baitan mantendu da; hortaz, irailaren 8tik aurrera ere erabili ahalko da.

Bisita horren edukiak hartzaile zehatz horiei egokituta egongo dira, eta erreserba egiteko ohiko bidea erabili beharko da: www.euskararenetxea.eus.

Online plataforma baten bidez Euskararen Interpretazio Zentroko gidari espezializatu batek bisita dinamiko eta parte hartzaile bat eskaintzen du. Euskararen ibilbidea eta egoera ezagutzeaz gain, esperientziak partekatzeko eta hausnartzeko aukera ere eskaintzen du.

Eusko Jaurlaritzak iragarri duenez, Euskal Diasporaren Egunaren harira egingo diren ekitaldi guztiak #EuskoChallenge traolaren baitan bilduko dira. “Irailaren 8an #euskaldiasporareneguna ospatuko da, eta zauden tokian zaudela, nola bizi duzun jakin nahi dugu. Erabili #EuskoChallenge traola eta erakutsi munduari nola ospatzen duzun egun berezi hau”.

Bizkaiko Derio udalerrian lau kultur ekitaldi ondu dituzte hil honetako lau igandeetan, Eureka Domeka! izenburupean; Derioko “malekoian” egingo dira, eta euriz eginez gero, Altxagako Gazte Txokoan aurkeztuko dira, 18:0etatik aurrera.

Ekitaldiak askotarikoak izango dira; esaterako, igandean, hilak 5, Miren Narbaiza Mice musikaria ariko da.

Irailaren 12an, Komiki Inprobisatu Saioa egingo dute Unai Iturrigak, Dani Fanok eta Iñigo Astizek.

Irailaren 19an, bertso saioa izango da: Nerea Ibarzabal eta Eli Pagola. Beñat Vidal gai jartzaile arituko da.

Azkenik, 26an musika itzuliko da, Westfalia Txoy System-en eskutik.

Iaz abiatu genuen Euskararen Etxeak eta Bizkaiko Foru Aldundiko Euskara, Kirola eta Kultura Sailak lehendabizikoz Hi(ZKI)bridoak. Literatura Mutanteak kultur zikloa, zeina literaturaren eta ahozkotasunaren inguruan ardazten den.

2020. urtea oso gorabeheratsua izanagatik ere, egitarauak oso harrera ona izan zuen kulturzaleen artean.

Hartara, bigarren edizioa egingo dugu 2021eko irailetik abendura, Euskararen Etxean.

Horrekin batera, aurten Euskarazko kultur ekitaldien sorkuntzarako Hi(ZKI)bridoak laguntza aurkeztuko dugu estreinakoz. Beka horrek 3.000 euroko saria bideratuko du 2022ko Hi(ZKI)bridoak zikloan estreinatuko den ekitaldi bat garatzeko.

AURKEZPENA:

Eguna: irailak 7

Ordua: 11:30

Lekua: Euskararen Etxea (Agoitz plaza 1, Bilbo)

2021/22 ikasturtea hastear dela, ikastetxeek Euskararen Etxean dagoen Euskararen Interpretazio Zentroa bisitatzeko aukera izango dute. Eskola-talde egonkorrak onartuko dira, gidari bakarrarekin.

Euskararen Interpretazio Zentroko bisitan euskararen historia, jatorria edota egoerari buruzko informazio baliagarria jasoko dute ikasleek. Egin erreserba.

Gogoratu ikastetxeek Euskararen Interpretazio Zentroko bisitaz gainera, Eskola programa egiteko aukera dutela; hau da, lantegi batean parte hartzeko aukera eskaintzen dieguela ikasleei: ikasleek euskararen erabilera eta sustapenarekin lotutako lantegi batean parte hartzeko aukera ere izango dute.

Jarraian, Eskola-programaren berri ematen duen bideoa ikus dezakezue:

Iaz, abiatu genuen Euskararen Interpretazio Zentroko online bisita ikastetxeentzat, eta egitasmoak oso harrera ona izan du. Hori dela eta, 2021/2022 ikasturte berrian ere online zerbitzu hori eskaintzen jarraituko dugu. Egin erreserba!

Ikastetxeek online plataforma baten bidez egin dezakete Euskararen Etxeko bisita, ikastetxeetatik konektatuz; Euskararen Interpretazio Zentroko edukiak modu dinamiko eta parte-hartzailean jasoko dituzte ikasleek, gidari espezializatu baten eskutik.

LH 3. mailatik Batxilergora arteko ikasleek parte har dezakete, baita Lanbide Heziketako ikasleek ere. 45 minutuko bisitak dira, eta euskaraz, gaztelaniaz edo ingelesez egin daiteke, baina euskarri eta material guztiak euskaraz izango dira.

Euskararen ibilbidea eta egoera ezagutzeaz gain, ikasleen esperientziak partekatzeko eta taldean hausnartzeko parada ere eskaintzen du.