Etxea(e)ko Euskararen

Euskararen zuzentasunari, egokitasunari eta naturaltasunari buruzko lau saio egingo dituzte Oihaneder Euskararen Etxeak, UEUrekin elkarlanean, ondutako Ahoskera Laborategian.

Ahoskera Laborategian, besteak beste, azentua, intonazioa eta euskal doinua jorratuko dituzte. Horretarako mahainguru bat eta hiru saio trinko antolatuko dituzte otsailetik apirilera bitartean:

Lehenengo saioa, mahai-ingurua, otsailaren 24an egingo da, Hitza lanabes, sarritan aldrebes izenburupean; Ilaski Serranok, Franc Dolosorrek eta Edurne Azkaratek parte hartuko dute jardunaldian.

Halaber, hiru saio trinkoak hauexek izango dira: Martxoaren 13an, Ahoskera(k) eta araua(k), Lourdes Oñederraren eta Oroitz Jauregiren eskutik. Martxoaren 27an, Kike Amonarrizek Nola jardun euskaraz erosoago eta lasaiago hitzaldia emango du. Azkenik, apirilaren 17an, 2tik 3dra, urratsez urrats laborategia zuzenduko du Julia Marinek. Hiru hitzaldi horien ostean, laborategiak egingo dira esperimentatzeko asmoz. Imanol Miranda, Jon Sanchez eta Alba Fernandez arituko dira bideratzaile.

Oihanederren arabera, “Ahozko euskararen inguruko lanketa berezia egin nahi da, eta praktikari garrantzi berezia emango zaio: saio bakoitzaren bigarren zatian, metodo enpirikoa geure egin, eta esperimentatu egingo da, ahozkoa lan-tresnatzat hartuta”.

Informazioa gehiago: oihaneder.eus

Izena emateko: ueu.eus

Artedrama eta Huts Teatroa antzerki-konpainiek Atzerrian lurra garratz estreinatuko dute otsailaren 12an, Oñatiko Santa Ana Antzokian. Berea ez den lurralde batean sustraitu behar duen Aurora Mora emakume kolonbiarraren inguruan ardazten da obra. “Posible al da gurea ez den lur batean sustraitzea? Posible, familia eta aberriaren zama gainean dugula, hegaldi propioari ekitea?”.

Amancay Gaztañagak zuzendu du obra Ander Lipus, Amancay Gaztañaga eta Laura Penagosen testuan oinarrituta. Miren Amurizak halaber, testuaren idazketan lagundu du. Oholtzan, Ander Lipus eta Laura Penagos arituko dira. Azkenik, Ibon Rg musikaz arduratu da.

Antzezlanaren sinopsiak honela dio: “Izerdi eta neke asko kostatu zaio hona heltzea. Izan ere, Aurora ez da euskal herritarra, ezta europarra ere. Berak bakarrik daki zenbat mespretxu jasan dituen. Zenbat kostatu zaion harrizko lur honetan sustraitzea. Baina Hermann Hessek zioen bezala: “biguna, gogorra baino ahaltsuagoa da. Ura haitza baino gogorragoa. Maitasuna, biolentzia baino indartsuagoa. Bere ama-lur Kolonbiari buruzko erakusketa bat aurkeztuko digu munduaren beste aldean. Duela bostehun urte hara joan zirenei Kolonbia zer zen, zer den eta zer izan nahi duen azalduko die amona Nayelik erakutsitako hitzekin”.

Leizaola Fundazioak Euskal Influencer-al izurrite garaian izenburuko topaketa egingo du otsailaren 4an, ostegunean, Euskararen Etxean.

Antolatzaileek jakinarazi dutenez, jardunaldia 17:00etan hasiko da, eta plaza gutxi egongo direnez, aurretik izena eman beharko da: info@leizaola.eus

Informazio gehiago: https://www.leizaola.eus/

Azpitituluak Euskaraz proiektuak Stanley Kubrick zinegile klasikoaren filmografia euskaratu du, “bertsio originalean, euskarazko azpidatziekin”.

Kubrick zinearen historiako sortzaile handienetarikoa da. Bere filmografia harribitxiz josta dago, tartean,  2001: A Space Odyssey (1968), A Clockwork Orange (1971), The Shining (1980) eta Full Metal Jacket (1987).

Azpitituluak Euskaraz egitasmoa bestalde, 2008. urtean abiatu zuen Luistxo Fernandezen, “komunitateko lanak koordinatuz, hainbat lagunen bidez azpitituluak kargatuz, eta Open Data Euskadiren eta Filmazpit-en ahalegin publikoak elkartuz, 10 urtean mila inguru azpidatzi bildu ziren”.

18 urte bitarteko haur eta nerabeei zuzendutako “Koldo Mitxelena” literatura lehiaketaren 32. edizioa abiatu du Donostiako Udalak; lanak  otsailaren 16a baino lehen aurkeztu beharko dira; originalak beharko dute izan.

Lehiaketan sei kategoria izango dira: komikia, komiki digitala, olerkia, ipuina, bertso papera eta mikroipuina.

Epaimahaia hauexek osatuko dute: Yolanda Arrieta, Beñat Gaztelumendi, Ana Malagon, Iñaki Martiarena Mattin, Inazio Mujika eta Arantxa Urretabizkaia.

Kategoria eta lehiaketa bakoitzeko saritu bakarra izango da.
Sari banaketa ekainaren 5ean egingo da Udaletxeko Pleno Aretoan.

Lehiaketari buruzko zehaztasun guztiak, hemen.

Musika esperimentalaren inguruan ardazten denHegoa Diskak diskoetxea abiatu du Londresen finkatutako Mikel Acosta musikariak. Zigiluaren lehenengo erreferentzia Angel Katarain ibilbide luzeko musikari, ekoizle eta soinu teknikari ordiziarraren lan elektronikoa izango da.

Katarainen disko homonimoak bederatzi doinu biltzen ditu, bere lantoki IZ estudioan grabatutakoak, Donostian, 1983etik 1993ra bitarte. Acostaren hitzetan, “estudioko esperimentu elektroniko bitxiak dira, dantza-pista huts baten eta esperientzia zinematografiko baten artean kokatzen direnak. Urrunetik entzuten diren ahotsak eta gitarra elektriko distortsionatuek Alemaniako elektronikako lehen esperimentatzaileen, post-punk-aren eta coldwave-aren eraginak islatzen dituzte”.

Binilozko LPan argitaratuko da diskoa, eta Acostak hiru kantu jarri ditu entzungai Acostak Hegoa zigiluaren bandcamp-ean.

Acostak, bestalde, hamar urte inguru daramatza Londresen bizitzen, eta bertan harremanak egin ditu euskal musikariekin. “Duela bederatzi urte Erresuma Batura joan nintzenetik, harreman handia egin dut euskal musikariekin. Atzerrian bizitzeak eta euskal musikarekiko benetako interesa duen jendea ezagutzeak ikuspegi desberdina eman dit eta nire kultura-ondarea hobeto ulertu dut. Zerbait egin beharra sentitu nuen jendearekin partekatzeko”.

Bertsozale.eus webgunean jasotzen denez, lehiaketaren xedea “bertsoaren aldaera guzien presentzia bermatzeaz gain, plazatik harago dauden bertsolariei adierazteko parada ematea da”.

Lanak otsailaren 28ra arte bidali ahalko dira, eta bi kategoriatan lehiatuko dira: gazteak eta helduak. Martxoaren 20an, halaber, Aitor Sarasua bertsopaper lehiaketaren epaia jakinaraziko da.

“Bertsopaper lehiaketa honen helburua bertsoaren aldaera guzien presentzia bermatzeaz gain, plazatik harago dauden bertsolariei adierazteko parada ematea da. Izan ere, tradizioz, Ipar Euskal Herrian, eta Euskal Herri osoan oro har, bertso idatziak leku handia izan du. Tradizio hori bermatu eta hedatu nahi dugu, Aitor Sarasua bertsogintzan eta Ipar Euskal Herriko bertso irakaskuntzan eta sustapenean hain leku garrantzitsua izan duena omentzearekin batera”.

Lehiaketari lotutako xehetasun gehiago, hemen.

‘Miñan’, migranteak eta euskaldunak (Susa, 2019) Amets Arzallusek idatzitako liburua izango dute hizpide martxoaren 3an, 18:00etan (ordua aurreratu daiteke, osasun egoera tarteko) Deustuko Berbaizu elkarteko Irakurleen Txokoak. Saioa Bilboko San Iganazio auzoan dagoen Euskararen Etxean.

Arzallusen lanak Ibrahima Balde ginearraren bizipenei ematen dio ahotsa. Izan ere, Irungo harrera sarean ezagutu zuten elkar, Amets Arzallus asiloa eskatzen dutenei tramitazioa egiteko laguntzen zebilela. Solasaldi horretan hezurmamitutako harremanaren emaitza da beraz Arzallusen nobela. Anaia desagertuaren bila hartu zuen Ibrahima Baldek Europarako bidea, sorterria, familia eta bere bizitza atzean utzita. Bidaiaren kronika da Miñan, Balderen ahotsaz eta Amets Arzallusen hitzez sortutakoa.

Idazlearen hitzetan, “Mediterraneoa zeharkatzen dutenek deshumanizatzea ezinbestekoa dute,  beraien  heriotzen, kanporatzeen edota  ilegalizatutako bizitzen gaineko ezaxola zabaltzeko. Baina bizitza horietako bakoitza bakarra da, eta, beraz, unibertsala”.

Igor Legarreta zuzendari bilbotarraren bigarren film luzea da Ilargi guztiak, eta Itziar Ituño, Haizea Carneros eta Josean Bengoetxea ditu protagonista. Euskararaz filmatua, banpiroen mitoaren inguruan ardazten da.

Beldurrezko filmetatik urrunduz, drama fantastikoa da Ilargi guztiak. Hala, filmak tratamendu naturalista eskaintzen du eta pisu dramatikoa narrazio existentzialean jartzen du, kontakizun erromantiko bihurtzeko: Azken gerra karlistaren garaian, neska bat umezurztegi batetik erreskatatu du basoaren sakonean bizi den emakume misteriotsu batek. Zaurituta dago neskatoa, eta hiltzeko zorian dagoela, aingeru bat ikusi duela sinetsiko du, neskatoaren bila etorri den aingerua, zerura eramateko. Laster jakingo du baina, egun berriaren egunsentian, izaki arraro horrek betiko bizitza eman diola konpainiaren truke.

Igor Legarretak Cuando dejes de quererme filma estreinatu zuen 2018an. Ilari guztiak, beraz, bere bigarren lan luzea da. Legarretak Jon Sagalá (La sala, 2019; Bosque de sombras, 2006) gidoilariarekin idatzi du filma.

Filmaren protagonista Haizea Carneros (12 urte) aktorea da eta hau bere lehen antzezpen-lana da. Carnerosekin batera aktore ezagun ugari aritu dira; tartean, Itziar Ituño (La casa de papel, 2017-gaur egun; Loreak, 2014) eta Josean Bengoetxea (Oreina, 2017, Malas Temporadas, 2005). Gainerako aktoreak Lier Quesada (Un otoño sin Berlín, 2015), Zorion Eguileor (El Hoyo, 2019, Agur Etxebeste!, 2019) eta Elena Uriz (Akelarre, 2020; Tasio, 1984) dira.