Etxea(e)ko Euskararen

18 urte bitarteko haur eta nerabeei zuzendutako “Koldo Mitxelena” literatura lehiaketaren 32. edizioa abiatu du Donostiako Udalak; lanak  otsailaren 16a baino lehen aurkeztu beharko dira; originalak beharko dute izan.

Lehiaketan sei kategoria izango dira: komikia, komiki digitala, olerkia, ipuina, bertso papera eta mikroipuina.

Epaimahaia hauexek osatuko dute: Yolanda Arrieta, Beñat Gaztelumendi, Ana Malagon, Iñaki Martiarena Mattin, Inazio Mujika eta Arantxa Urretabizkaia.

Kategoria eta lehiaketa bakoitzeko saritu bakarra izango da.
Sari banaketa ekainaren 5ean egingo da Udaletxeko Pleno Aretoan.

Lehiaketari buruzko zehaztasun guztiak, hemen.

Musika esperimentalaren inguruan ardazten denHegoa Diskak diskoetxea abiatu du Londresen finkatutako Mikel Acosta musikariak. Zigiluaren lehenengo erreferentzia Angel Katarain ibilbide luzeko musikari, ekoizle eta soinu teknikari ordiziarraren lan elektronikoa izango da.

Katarainen disko homonimoak bederatzi doinu biltzen ditu, bere lantoki IZ estudioan grabatutakoak, Donostian, 1983etik 1993ra bitarte. Acostaren hitzetan, “estudioko esperimentu elektroniko bitxiak dira, dantza-pista huts baten eta esperientzia zinematografiko baten artean kokatzen direnak. Urrunetik entzuten diren ahotsak eta gitarra elektriko distortsionatuek Alemaniako elektronikako lehen esperimentatzaileen, post-punk-aren eta coldwave-aren eraginak islatzen dituzte”.

Binilozko LPan argitaratuko da diskoa, eta Acostak hiru kantu jarri ditu entzungai Acostak Hegoa zigiluaren bandcamp-ean.

Acostak, bestalde, hamar urte inguru daramatza Londresen bizitzen, eta bertan harremanak egin ditu euskal musikariekin. “Duela bederatzi urte Erresuma Batura joan nintzenetik, harreman handia egin dut euskal musikariekin. Atzerrian bizitzeak eta euskal musikarekiko benetako interesa duen jendea ezagutzeak ikuspegi desberdina eman dit eta nire kultura-ondarea hobeto ulertu dut. Zerbait egin beharra sentitu nuen jendearekin partekatzeko”.

Bertsozale.eus webgunean jasotzen denez, lehiaketaren xedea “bertsoaren aldaera guzien presentzia bermatzeaz gain, plazatik harago dauden bertsolariei adierazteko parada ematea da”.

Lanak otsailaren 28ra arte bidali ahalko dira, eta bi kategoriatan lehiatuko dira: gazteak eta helduak. Martxoaren 20an, halaber, Aitor Sarasua bertsopaper lehiaketaren epaia jakinaraziko da.

“Bertsopaper lehiaketa honen helburua bertsoaren aldaera guzien presentzia bermatzeaz gain, plazatik harago dauden bertsolariei adierazteko parada ematea da. Izan ere, tradizioz, Ipar Euskal Herrian, eta Euskal Herri osoan oro har, bertso idatziak leku handia izan du. Tradizio hori bermatu eta hedatu nahi dugu, Aitor Sarasua bertsogintzan eta Ipar Euskal Herriko bertso irakaskuntzan eta sustapenean hain leku garrantzitsua izan duena omentzearekin batera”.

Lehiaketari lotutako xehetasun gehiago, hemen.

‘Miñan’, migranteak eta euskaldunak (Susa, 2019) Amets Arzallusek idatzitako liburua izango dute hizpide martxoaren 3an, 18:00etan (ordua aurreratu daiteke, osasun egoera tarteko) Deustuko Berbaizu elkarteko Irakurleen Txokoak. Saioa Bilboko San Iganazio auzoan dagoen Euskararen Etxean.

Arzallusen lanak Ibrahima Balde ginearraren bizipenei ematen dio ahotsa. Izan ere, Irungo harrera sarean ezagutu zuten elkar, Amets Arzallus asiloa eskatzen dutenei tramitazioa egiteko laguntzen zebilela. Solasaldi horretan hezurmamitutako harremanaren emaitza da beraz Arzallusen nobela. Anaia desagertuaren bila hartu zuen Ibrahima Baldek Europarako bidea, sorterria, familia eta bere bizitza atzean utzita. Bidaiaren kronika da Miñan, Balderen ahotsaz eta Amets Arzallusen hitzez sortutakoa.

Idazlearen hitzetan, “Mediterraneoa zeharkatzen dutenek deshumanizatzea ezinbestekoa dute,  beraien  heriotzen, kanporatzeen edota  ilegalizatutako bizitzen gaineko ezaxola zabaltzeko. Baina bizitza horietako bakoitza bakarra da, eta, beraz, unibertsala”.

Igor Legarreta zuzendari bilbotarraren bigarren film luzea da Ilargi guztiak, eta Itziar Ituño, Haizea Carneros eta Josean Bengoetxea ditu protagonista. Euskararaz filmatua, banpiroen mitoaren inguruan ardazten da.

Beldurrezko filmetatik urrunduz, drama fantastikoa da Ilargi guztiak. Hala, filmak tratamendu naturalista eskaintzen du eta pisu dramatikoa narrazio existentzialean jartzen du, kontakizun erromantiko bihurtzeko: Azken gerra karlistaren garaian, neska bat umezurztegi batetik erreskatatu du basoaren sakonean bizi den emakume misteriotsu batek. Zaurituta dago neskatoa, eta hiltzeko zorian dagoela, aingeru bat ikusi duela sinetsiko du, neskatoaren bila etorri den aingerua, zerura eramateko. Laster jakingo du baina, egun berriaren egunsentian, izaki arraro horrek betiko bizitza eman diola konpainiaren truke.

Igor Legarretak Cuando dejes de quererme filma estreinatu zuen 2018an. Ilari guztiak, beraz, bere bigarren lan luzea da. Legarretak Jon Sagalá (La sala, 2019; Bosque de sombras, 2006) gidoilariarekin idatzi du filma.

Filmaren protagonista Haizea Carneros (12 urte) aktorea da eta hau bere lehen antzezpen-lana da. Carnerosekin batera aktore ezagun ugari aritu dira; tartean, Itziar Ituño (La casa de papel, 2017-gaur egun; Loreak, 2014) eta Josean Bengoetxea (Oreina, 2017, Malas Temporadas, 2005). Gainerako aktoreak Lier Quesada (Un otoño sin Berlín, 2015), Zorion Eguileor (El Hoyo, 2019, Agur Etxebeste!, 2019) eta Elena Uriz (Akelarre, 2020; Tasio, 1984) dira.

Elkar fundazioak eta Euskal Kultur Erakundeak Iparraldeko idazleak euskaraz idaztera lehiatzeko xedearekin, EKE-Elkar literatura beka eratu dute. Bi urterik behin idazlanaren generoa aldatu egiten da. Hala, 2021eko deialdi honetan, komikia edo nobela grafikoa izango da generoa.

Deialdian Iparraldeko edonork parte har dezake, adin mugarik gabe.

Laguntzaren oinarrietan jasotzen denez, “lehiaketan parte hartu nahi duenak, hiru aldakitan eta bere benetako izena agerian jarri gabe, honakoak bidali beharko ditu bere egitasmoarekin batera:

• Landu nahi duen proiektuaren aipamen laburra, 2-4 orrialdekoa, ezaugarri nagusiak agertuz, hala nola, luzera, estiloa, zergatiak, iturriak, egitura, helburua edo egoki idurituko zaion beste edozein xehetasun.
• Obraren erakusgai edo lagin bat 4-5 orrialdekoa.
• Gutunazal hetsia, kanpoko aldean idazlanaren izenburua izango duena eta barruan egilearen izen-abizenak, helbidea, telefonoa eta nortasun agiriaren fotokopia”.

6.000 euroko diru saria izango du bekak, eta maiatzaren 31 arte dago epea egitasmoak aurkezteko. Ekain amaieran jakinaraziko da proiektu irabazlea epaimahaiak eta datorren urteko martxorako egin beharko da lana.

Bekari lotutako xehetasun guztiak: hemen.

Orain, euskaltegiek online plataforma baten bidez egin dezakete Euskararen Etxeko bisita, euskaltegietatik konektatuz; Euskararen Interpretazio Zentroko edukiak modu dinamiko eta parte-hartzailean jasoko dituzte ikasleek, gidari espezializatu baten eskutik.

COVIDak eragindako egoerari erantzunez, aurrerantzean, euskaltegiek Euskararen Interpretazio Zentroko bisita online egiteko aukera dute.

Ikasleentzat bestelako esperientzia bat da. Klaseko jardunean txertatzeko egokia da. Euskararekiko motibazioa sendotzeko aproposa.

Ondoko gaiak landuko dira:Euskararen jatorria, Euskararen aniztasuna, Euskararen aldeko lana eta Euskararen biziberritzea

Euskararen ibilbidea eta egoera ezagutzeaz gain, ikasleen esperientziak partekatzeko eta taldean hausnartzeko parada ere eskaintzen du.

Erreserbak: 944 028 081 (Erreserbak gutxienez bisita eguna baino hiru egun lehenago egin beharko dira).

Informazio gehiago

Haurrei zuzenduriko album ilustratuak aurkeztu ahalko dira.  Album ilustratu bezala ulertzen dira testua eta irudia elkarren osagarri dituzten lanak: “Lanak euskaraz idatziak, jatorrizkoak eta argitaratu gabeak izanen dira. Ez da onartuko beste inondik moldatutako lanik, ezta aurretik saririk jaso duenik ere”.

Aurkezteko epea maiatzaren 7an amaituko da eta epaimahaiak ekainaren 30a hartuko du erabakia. Sari bakarra izango da, 5.000 eurokoa; lan saritua Pamiela argitaletxeak plazaratuko du.

“Lehiaketan parte hartzen duten egileek albumaren maketa aurkeztu beharko dute, hau da, azken bertsioa inprimatuta, bukatutako albumean agertuko liratekeen testu zein ilustrazioekin. Ez da maketa koadernatu beharrik, nahikoa da maketa modu xume batez jostearekin (grapekin, uztaiekin, espiralarekin e. a.). Horretaz gain, maketaren kopia bat bidali beharko dute: pdf formatuan, lan osoa fitxategi bakarrean. Kopia pendrive batean entregatuko dute (aholkatzen da fitxategiek ez izatea 20 mega baino gehiago). Albumaren testua ere aurkeztu beharko dute, word formatuan (pendrivean sartu beharko dute). Egileek nahi badute, irudi originalak bidal ditzakete epaimahaikideek jatorrizko lana ikus dezaten.

Lanak izengoitiaz izenpeturik egongo dira, eta lanarekin batera, gutun-azal itxi bat aurkeztuko da datu pertsonalekin. Helbide honetara bidaliko dira: Etxepare Saria, Leitzako Udala-Euskara Zerbitzua, Elbarren 1, 31880 Leitza (Nafarroa)”.

Informazio gehiago

Euskaltzaleen Topaguneak ondutako “Mintzalaguna elkarrekin!” ekimenaren bigarren deialdia zabalik da. Ekimenak euskaraz aritzeko gune eta uneak sortzen ditu. “Mintzalagunek elkarrekin euskara bizi eta erabiltzen dute”.

Topaguneak jakinarazi duenez, “urrian ikasturtea hastearekin batera, Mintzalagun talde berriak sortu ziren. Urtarrilean komunitatearen sareak ehuntzen jarraituko du, bigarren izen emate deialdiari esker. Mintzalaguna euskara bizi eta erabiltzeko aukera paregabea da”.

Hala, 7.000 lagun elkartzen dira mintzapraktika saioetan, eta horrekin batera, aisialdi esperientziak partekatzen dituzte.

“Uda ondoren, asteroko hitzorduei ekin zieten, elkarrekin esperientzia aberasgarriak bizitzeko gogoz. Urtarrilean berriz ere mintzapraktika egiteko bilduko dira, bigarren deialdian bat egin duten mintzalagun berriekin batera”.

Informazio gehiago: https://labur.eus/P52Wo