Etxea(e)ko Euskararen

Akademiakideek martxoaren 26a baino lehen eman behar dute bost hauetako baten aldeko botoa: Luis Garderen Aireportuko musika, Pello Lizarralderen Argiantza, Uxue Alberdiren Dendaostekoak, Idoia Garzesen Mendiko gaitza eta Joxean Agirreren Nobela errealista bat.

111 akademiaren arabera, “2020. urtean euskal literaturak utzitako uzta zabaletik bost horiek izan dira urteko libururik gogokoena hautatzeko bidean lehenengo bozketa txanda gainditu eta bigarrenera igaro direnak”.

Akademiak, apirilaren azkenean jakinaraziko du 2020ko 111 Akademiaren Saria.

Informazio gehiago: https://labur.eus/VR1UH

Xake Produkzioak antzerki-taldearen antzezlanak maskulinitatea jorratzeko duen “modu originala” azpimarratu du epaimahaiak. Horrekin batera, obra “bikaina” dela adierazi du aho batez epaimahaiak. Martxoaren 27an egingo dute saria banatzeko ekitaldia, Viktoria Eugenia antzokian, eta bertan taularatuko dute berriz obra.

Iragan irailean, Xake Produkzioak konpainiak Fadoak entzuten zituen gizona obra estreinatu zuen Tolosako Leidor Antzokian. 2019an Eusko Jaurlaritzako Antzerki Testuen idazketarako diru laguntza eta Hitzartutako Zirkuituko Produkziorako diru laguntza jaso ondotik, konpainaik bere hirugarren antzezlana estreinatu zuen, konpainiaren bosgaren urteurrenarekin batera.

Orain, XXI. Donostia Antzerki Saria irabazi du: 12.000 euro eta Juan Luis Goenagaren margolan bat jasoko ditu konpainiak. Halaber, martxoaren 27an, Antzerkiaren Nazioarteko Egunean, egingo dute saria banatzeko ekitaldia, Viktoria Eugenia antzokian, eta bertan taularatuko dute berriz obra.

Honatx obraren sinopsia: “Ander Huelvako Ayamonte herrian antolatzen den fado lehiaketa amateur batera doa bertan parte hartzeko asmoz. Autostopean ari dela, Mariok jasoko du bere kamioian. Kasualitateak kasualitate, Anderrek eta Mariok lehenagotik ezagutzen dute elkar, baina urteak dira ez dutela elkarren berri izan. Berezia izango da elkarrekin egingo duten bidaia, batez ere, Masku izeneko pertsonai misteriotsuak baldintzatuko duelako”.

Euskal Kultur Erakundeak Ibilki programaren 8. edizioa abiatu dut: “Gobernuaren erabakiek ahalbidetuko dutelakoan, maiatza bukaera arte, publikoak euskal antzerkiaren kalitatea eta aniztasuna deskubritzeko aukera berri bat izanen du Azkainen, Baionan, Bidarten, Ziburun, Hendaian, Maulen, Baigorrin eta Donibane Lohizunen antolatu zortzi antzezlanen bidez”.

Euskal Herriko zortzi antzerki talderen hogei bat emanaldi bilduko ditu egitarauak.

Bada, Ibilki programa, gaur, martxoaren 9an, hasiko da Baionan, Atx Teatroa konpainiaren Tomiris antzezlanarekin. Mendekuaren inguruko antzezlana da, indarkeria matxistaren inguruan ardazten dena, eta errealitatea eta fikzioa nahastu egiten dira. Sentsuala eta era berean gordina da obra, erreala eta fantastikoa.

Xake Produkzioak, Bonbon Beltz Konpainia eta Eleka Konpania dira zikloan parte hartuko duten beste antzerki-talde batzuk. Informazio guztia, hemen.

Eusko Jaurlaritzaren 13/2021 DEKRETUA, martxoaren 6koaren arabera, museo, erakusketa-areto, monumentu eta bestelako kultura-ekipamenduetan, talde-bisitak 6 pertsonakoak izango dira, monitorea edo gida kontuan hartu gabe, betiere, ezinbesteko osasun-neurriak ezarrita. Azkenik, eskola-talde egonkorrak gidari bakarrarekin joan ahal izango dira museoetara. 

Bada, Euskararen Etxeko kasuan:

• Euskararen Interpretazio Zentroko talde-bisitak sei pertsonakoak izan ahalko dira, gidaria aintzat hartu gabe.

• Horrekin batera, Euskal Alien Nazioa ihes-gelan 6 laguneko taldeak onartuko dira (orain arte 4ko taldeak ziren).

• Azkenik, ikastetxeak “eskola-talde egonkorrekin” etorri ahalko dira Euskararen Etxeko Euskararen Interpretazio Zentrora.

Ikastetxeentzako eskola programa

Gogoratu ikastetxeek Euskararen Interpretazio Zentroko bisitaz gainera, Eskola programa egiteko aukera dutela, hau da, lantegi batean parte hartzeko aukera eskaintzen dieguela ikasleei.

Hartara, Interpretazio Zentrora egindako bisitan euskararen historia, jatorria edota egoerari buruzko informazio baliagarria jasoko dute ikasleek. Era berean, euskararen erabilera eta sustapenarekin lotutako lantegi batean parte hartzeko aukera ere izango dute.

Jarraian, Eskola-programaren berri ematen duen bideoa ikus dezakezue:

Berria-k ondutako Sortzaileak garai pandemikoan online mintegian parte hartuko dute Leire Iribarne Diabolo Kiwi musika taldeko kideak, Ander Lipus aktoreak eta Nerea Ibarzabal Txakur Gorria sormen taldeko kideak. Ane Eslava kazetaria bestealde, moderatzaile arituko da.

Mintegia etzi, martxoak 10, egingo da, 19:00etatik aurrera, online, Zoom bidez.

“COVID-19aren pandemiak gogor jo du kultura, eta kalterik handienak pairatu dituzten sektoreetako batzuk dira arte eszenikoak, bertsolaritza eta musika. Horietan aritzen diren hiru sortzailerekin aztertuko dugu zeintzuk izan diren eragin nagusiak, beren esperientzia pertsonaletan oinarrituta”.

Informazio gehiago, hemen.

Bilbon dagoen Euskararen Etxeko Euskararen Interpretazio Zentroan abiatu da Euskal Alien Nazioa ihes-gela otsailaren hasieran. Aste Santuari begira, ihes-gela arratsaldero bisitatu ahalko da, martxoaren 29tik apirilaren 10era, jaiegunetan izan ezik: lehenengo txanda, 16:15 – 17:15 eta bigarren txanda, 17:45 – 18:45

Parte-hartzaileek euskarari lotutako zientzia fikziozko misterioa askatu beharko dute aretotik atera ahal izateko:  “2155. urtean gaude. Estralurtarrak Euskal Herrira iritsi berri dira euskararekiko mirespenak itsututa. Beraien espazio-ontzia Euskal Herriko txoko guztietatik ikus daiteke. Beraien helburua argia da: euskara hartu eta beraien bizilekura eraman…”.

• Iraupena: ordubete.
• Tokia: Euskararen Interpretazio Zentroa (Euskararen Etxea).
• Jokalari kopurua: 6 gehienez.
• Adina: 13 urtetik aurrera. Taldean, gutxienez, adin nagusiko batek egon beharko du.
• Prezioa: doan
• Egunak: martxoaren 29tik apirilaren 10era, arratsaldero (jaiegunetan izan ezik)
• Ordutegia: 
• 1. txanda: 16:15 – 17:15
• 2. txanda: 17:45 – 18:45

Egin erreserba, hemen.

Itxaro Borda, Maialen Lujanbio eta Xabier Erkiziak zuzendutako Hizketaldi Handia: Non dago Lekeitio? mahai-inguru zikloa hasiko da bihar, Tabakaleran.

2021eko udaberrian, Tabakaleran egingo den Komunikazio-Inkomunikazio erakusketa-proiektuaren baitan egingo da berbaldia. Komunikazio-Inkomunikazio egitasmoak askotariko jarduerak bilduko ditu : hitzaldi, mintegi, erakusketa eta musika.

Tabakaleraren arabera, “egitasmo honek, Mikel Laboaren Lekeitioak izeneko obra esperimentalak ditu abiapuntu, eta bereziki du aztergai Lekeitioetan gauzatzen den materia desberdin eta askotariko jatorrien arteko lotura: musika eta herri kultura, abangoardia literario eta artistikoetatik eratorritako piezak eta ahozkotasuna, hizkuntza(k) eta hizkeren arteko gurutzatzeak eta borrokak, edo muntaiaren eta itzulpenaren erabilpena”.

Egitaraua: “Hizketaldi Handia”

Martxoak 5, 18:00-19:30, Sarrera

• Itxaro Borda, Maialen Lujanbio eta Xabier Erkizia: Aurkezpena EUS
• Lawrence Abu Hamdan: Walled Unwalled (2018) (Zine-proiekzioa. Azpitituluak ES)
• Frédéric Jouanlong: Karawane (Performancea). Frédéric Jouanlongek ahotsa eta bolumena emango dizkio Hugo Ballen dadá testuari.

Martxoak 6, 11:00-13:30, Hitz ezin/ Hitz egin  

• Itxaro Borda  (Moderatzailea) EUS
• Beñat Achiary: Kontzertua
• Antonio Casado: Erresonantzia eta Kiromantzidxa: arte soziala pandemia garaietan EUS
• Juan Garzia: Munduak euskaratzen (ONLINE) EUS
• Juan Gorostidi: Gorrotoaren politikaz: sumindura, azken giza baliabidea EUS

Martxoak 6, 15:30-18:00, Ze distantzia behar du mirak?

Maialen Lujanbio (Moderatzailea)  

• David Toop: A Disconnected Voice: voices with and without bodies (ONLINE) EN
• Karine Etxeberri: Uraren kantuak EUS
• Iván de la Nuez: Desde un lugar en la retaguardia ES
• Bernardo Atxaga: Sehaska kanta bat Etiopian EUS

Martxoak 6, 18:30-21:00, Belarriaren amilizuak  

• Xabier Erkizia (Moderatzailea)   
• Raul Cantizano: El baile de las cuerdas (kontzertua)
• Hannah Silva: The Sounds Inside Speech (ONLINE) EN
• Alessandro Bosetti: Sistéma, an opera on tutto e niente (ONLINE) EN
• Ainara Santamaria: Esperimentazioaren tradizioak Euskal Herrian EUS
• Ramon Lazkano: (Hitz) Instrumentala EUS

Martxoaren 9tik 29ra bitarte egingo da Bilboko Loraldiaren zazpigarren edizioa. Jaialdia 13 gunetara zabalduko da Sormenari zor lelopean. Ohikoa denez, diziplina ugari uztartuko ditu Loraldiak.

“Sormenari zor da aurtengo festibalerako aukeratu den lema eta Loraldian gertatuko denaren erakusle da. Diziplina anitz, askotariko formatuak eta mota ezberdinetako ekintzak burutuko dira. Aurtengo edizioan teatroa, dantza, musika, literatura, zinema, artea eta bertsolaritza presente izango dira”.

Edizio honetan euskal kulturako zenbait erreferente omenduko ditu jaialdiak, besteak beste, Xabier Lete, Joseba Sarrionandia eta Agustin Xaho.

Horrekin batera, emakume gazte askok parte hartuko dute. “Aurtengo edizioak ahotsa emango die sortzaile gazte askori, baita hainbat emakumeri ere: Idoia Azurmendi, Olatz Salvador, Ainhoa Urgoitia, Garazi Etxaburu… Hori dena gutxi balitz, Gaztea sarietan arrakasta izugarria izan duen Zetak musika taldea datorkigu gurera, eta diziplina ugari uztartuko ditu Loraldiak: dantza eta bertsoa, txalaparta eta klakea…”.

Zetak taldearena izango da, hain zuzen, egitarauko ekitaldi garrantzitsuena gazteen artean lortu duen arrakastaren ondorioz. Emanaldia martxoaren 12an izango da: “Zetak taldeak Zeinen ederra izango den diskoaren ikuskizuna plazaratuko du Arriagako eszenatokian. Pello Reparaz musikariak sortu du proiektu ikusgarri hau musika elektronikoa euskaraz egiteko xedearekin”.

Aurtengo edizioak, gainera, berritasun batzuk ditu: kabareta, rol jokoak, autogida…

Informazio gehiago: loraldia.eus

Deustuko Berbaizu elkarteak Euskararen Etxean egingo du Irakurleen Txokoaren hurrengo hitzordua, etzi, martxoak 3, 18:00etatik aurrera. Saio horretan Amets Arzallus bertsolari eta idazleak parte hartuko du eta Miñan (Susa) liburua izango du hizpide.

Arzallusen lanak Ibrahima Balde ginearraren bizipenei ematen dio ahotsa. Izan ere, Irungo harrera sarean ezagutu zuten elkar, Amets Arzallus asiloa eskatzen dutenei tramitazioa egiteko laguntzen zebilela. Solasaldi horretan hezurmamitutako harremanaren emaitza da beraz Arzallusen nobela. Anaia desagertuaren bila hartu zuen Ibrahima Baldek Europarako bidea, sorterria, familia eta bere bizitza atzean utzita. Bidaiaren kronika da Miñan, Balderen ahotsaz eta Amets Arzallusen hitzez sortutakoa.

Idazlearen hitzetan, “Mediterraneoa zeharkatzen dutenek deshumanizatzea ezinbestekoa dute,  beraien  heriotzen, kanporatzeen edota  ilegalizatutako bizitzen gaineko ezaxola zabaltzeko. Baina bizitza horietako bakoitza bakarra da, eta, beraz, unibertsala”.