Etxea(e)ko Euskararen

Bihar, irailak 30, Euskararen Etxea, plazara erakusketa ibiltariaren aurkezpena egingo dute, BAM Irakasleen Unibertsitate Eskola kokatuta dagoen Derioko Seminarioan, 11:00etatik aurrera.

Ekitaldian hauexek parte hartuko dute: Jone Ozerinjauregi BAM Irakasleen Unibertsitate Eskolako zuzendariak, Isaac Amezaga, Bizkaiko Foru Aldundiko Euskara Zuzendariak eta Iurdana Akasuso Euskararen Etxeko zuzendariak.

Erakusketa Bilboko Euskararen Etxean kokatutako Euskararen Interpretazio Zentro berriaren lagin bat da, zentroko edukietatik abiatuta ondu baita.

Euskararen Etxea, plazara erakusketaren bidez, Euskararen Etxeak bere hormak gainditu eta Interpretazio Zentro berriaren edukien lagin txiki bat aurkeztu nahi du, eta herritarrak bere egoitzara hurbiltzera gonbidatu nahi ditu, bisita esperientzial eta ludiko batetik abiatuta, bisitariak euskararen izaera poliedrikoan murgildu daitezen.

Open egitasmoaren barruan bisitatu ahalko den eraikinetako bat izango da Euskararen Etxea; Open irailaren 29tik urriaren 5era egingo da, eta guztira, 89 eraikin bisitatuko dituzte  herritarrek hiri-diseinu eta -garapeneko eraikin enblematikoak eta jardunbide egokiak ezagutu ditzaten.

Hala, Euskararen Etxea urriaren 4an bisitatu ahalko da, Open ekimenaren barruan, 10:00etatik aurrera.

Euskararen Etxeko eraikinari dagokionez, Euskararen Etxea 2004an inauguratu zen, euskal gizartean hizkuntza sustatzeko eta zaintzeko erreferente izateko helburuarekin. Eraikina 50eko hamarkadan eraiki zen, frankismo garaian. Besteak beste, bertan Euskararen Interpretazio Zentroa kokatzen da, zeinak euskararen bizi-indarra eta aniztasuna transmititu nahi dituen. Halaber, inplikazio pertsonala aldarrikatzen du, norberak egin baitio ekarpena euskarari. Azken batean, euskararen askotariko izaerak batu egiten gaitu, gehitu egiten du.

Open proiektuari buruzko informazio guztia, hemen.

BEST – Bizkaiko Emakume Sortzaileen Topaketak lau urte daramatza emakume sortzaileen arteko sarea josten, ikusgarritasuna ematen eta kolektibitate feministatik abiatutako gogoeta sustatzen. Xedea sarea sortzea da, emakumeen presentzia nabarmentzea eta glotofeminismoaren eta intersekzionalitatearen begiradatik kultura ulertzeko modu berriak sortzea.

Edizio honetan ardatz nagusiak hauexek izango dira: Bizkaiko emakume musikarien egoera, emakume sortzaileen erresistentziak eta “unibertsaltasun” hegemonikoari buruzko eztabaidak.

Euskararen Etxeak ere parte hartuko du ekimenean. Hala, irailaren 29tik urriaren 15era, Bizkaiko emakume musikariak glotofeminismotik izenburuko erakusketa ikusi ahalko da Euskararen Etxean, Mintzo aretoan.

“Erakusketak Bizkaiko emakume musikarien egoera aztertzen du glotofeminismoaren ikuspegitik. Emakume musikariek dituzten erronkak bistaratuko dira: ikusgarritasun falta, espazio publikoaren maskulinizazioa, genero-arrakalak eta hizkuntza gutxituen erabileraren erronkak. Lan hau Mar Molinak eta Alaitz Urrutiak sortu dute, datu, testigantza eta ikus-entzunezko materialen bidez. Erakusketak formatu bisual eta esperientziala eskaintzen du, ikusleak hausnarketarako espazio aktibo batean murgilduz”.

Topaketei buruzko informazio guztia, hemen.

Bizkaiko Foru Aldundiak Ondarearen Europako Jardunaldien 25. edizioa aurkeztu du gaur, zeina arkitekturaren inguruan ardaztuko den. Hala, urrian zehar, 160 erakundek (54 udal, 79 kultura-entitate, 27 museo) antolatutako 250 kultura-jarduera izango dira, betiere Bizkaiko arkitektura-ondarea herritarrengana hurbiltzeko asmoz.

Euskararen Etxeak ere jardunaldi horietan parte hartuko du: urriaren 17an, familiei zuzendutako Komunitatea Eraikiz izenburuko tailerra izango da, 17:30etik aurrera: “komunitatea landuko dugu, jolasa eta arkitekturaren bitartez. Criaturas Infinitas kolektiboaren lantegiak irudimena, pentsamendu kritikoa eta arazoen konponbidea sustatzen ditu”.

Egitarau osoa eta erreserbak www.ondareabizkaia.eus webgunean edo 94 402 80 81 / info@euskararenetxea.eus

Hostopostoak 6 eta 10 urte bitarteko haurrentzako proposamen dibertigarria da, eta bere helburua euskaraz eta familian edo taldean jolastea da. Horretarako, parte hartzaileak mahai-jolas erraldoi batez baliatuko dira.

Hostopostoak hileko azken ostiralean egingo da, 17:30etik 18:30era.

Jardueran parte hartzeko hurrengo hitzordua irailaren 26a izango da.

JARDUERARAN EZAUGARRIAK:

Egutegia:
Hileko azken ostiralean, Euskararen Etxean
Nork parte har dezake?
6 eta 10 urte bitarteko umeak dituzten familia zein taldeak
Parte-hartzaile kopurua:
3 lagun gutxienez eta 10 gehienez. Hiru umeko heldu batek egon beharko du.
Ordutegia:
17:30-18:30
Iraupena:
50 minutu
Prezioa:
Doan
Erreserbak:
944 028 081

Soziolinguistikako Klusterrak Gipuzkoako Foru Aldundiaren laguntzarekin burututako ikerlan hau  2021eko Gipuzkoako hizkuntza-aniztasuna azterketaren ondotik dator. Oraingoan, baina, bereziki erreparatu diote Erdialdeko eta Hego Amerikako herrialdeetatik etorritako pertsonei.

Klusterrak jakinarazi duenez, “kolektibo horren presentziak etengabeko hazkundea izan du azken bi hamarkadatan: 2001ean 3.957 pertsonak osatzen zuten, eta 2023rako 45.863 dira, Gipuzkoako biztanleriaren %6,3 eta etorkinen populazio osoaren %52,3 inguru. Datu horiek erakusten dute Gipuzkoako gizartea gero eta anitzagoa dela, eta hizkuntza-politiken ikuspegitik erronka eta aukera berriak planteatzen ditu”.

Ikerketak ikuspegi kualitatiboa izan du ardatz, integrazio soziolinguistikoaren prozesuak eta bizipenak sakontasunez aztertzeko asmoz.

Ikerketari buruzko xehetasun gehiago, hemen.

Txosten osoa, hemen.

Euskarari buruzko 2024ko bibliografia hautatua bildu dute HABE Liburutegiko gidak 13 alean.

Liburutegiak berak egindako hautaketa-lan baten fruitua da, honakoak aintzat hartuta: “jorratzen ditugun  espezializazio eremua eta euskararen didaktikari, euskararen alderdi  psikologikoei eta Euskal Herriko egoera soziolinguistikoari egiten diogun jarraipen estua”.

Gidan hauexek jasotzen dira:

• Euskararen eta Euskal Herriaren egoera soziolinguistikoa aztertzen dituzten lanen erreferentziak.
• Euskararen alderdi didaktiko nahiz psikologikoak aztertzen dituzten lanen erreferentziak.
• Euskal Herriko hezkuntza ereduak, hizkuntzei dagokienean, aztertzen dituzten lanen  erreferentziak.
• Euskara ikasteko materialak.

Guztiak dira 2024an plazaratutako lanak: liburuak, liburuetako artikuluak, aldizkarietako artikuluak.

Informazio gehiago, hemen.

Euskararen Etxeko ateak irekita izango dira udan ere, gurera etorriko direnei gure zerbitzuak eskaintzeko asmoz, ekainaren 1etik abuztuaren 31ra bitarte.

Euskararen Interpretazio Zentroa:

• Udako ordutegia:
  • Astelehenetik ostiralera: 10:00 –19:00
  • Larunbatetan: 10:00 – 14:00
    
• Bisita gidatuak:
  • Euskarazko bisita gidatuak:
    • Astelehenean, 16:30ean; ostegunean, 12:00etan, eta larunbatean, 12:00etan
  • Gaztelaniazko bisita gidatuak:
    • Asteartean, 12:00etan; asteazkenean, 16:30ean, eta larunbatean, 11:00etan
      
• OHARRA: Ordu tarte horietaz gainera, badago bisita gidatuak egiteko aukera. Egin erreserba: 94 402 80 81

Jarduerak:

• “Udan, hitz eta jolas!” haurrentzako egonaldia, 2014-2018 urte bitartean jaiotako umeentzat
  • Ekainak 23 – 27
  • Ekainak 30 – uztailak 4
  • Uztailak 7 – 11
    
• “Euskal Alien Nazioa” ihes-gela:
  • Ostegun eta ostiral arratsaldeak, 17:30ean

• “Hostopostoak” familia-programa
  • Ekainak 28, uztailak 26, abuztuak 30, 11:00-12:00

Albistea Poloniako Białystok hirian jakinarazi dute, bertan egin baita 2025eko edizioa. Euskararen Etxeko zuzendari Iurdana Acasuso Polonian izan da EMYA sarietarako finalista izan baita Euskararen Etxea.

2026ko ekainaren 10etik 14ra, Bilbo izango da Europako museologia eszenaren erdigune. Euskalduna Jauregian egingo dira European Museum of the Year Awards (EMYA) sarien banaketa eta kongresua, European Museum Forum-ek antolatuta.

Bilbok Europako museo-eszenako ekitaldirik prestigiotsuena hartuko du datorren urtean. Hiru eguneko kongresua izango da museoen sektoreko profesionalentzat eta kultur eragileentzat. Ondoren, sari banaketaren gala egingo da, eta hainbat kultura-ekintza osagarri ere antolatuko dira hirian.

Leixuri Arrizabalaga, Euskara, Kultura eta Kirol Saileko foru diputatua, pozik agertu da albistearekin: “Nazioarteko kultur ekitaldi garrantzitsu bat hartuko dugu gure hirian, aukera paregabea da gure museoak ezagutzera emateko, nazioarteko harremanak sendotzeko eta ezagutza trukerako.”

EMYA sariak

1977an Europako Kontseiluak sortuta, European Museum of the Year Awards sariak museoen bikaintasuna eta berrikuntza aitortzen dituzte. Azken bi urteetan ireki edo berritu diren museoei zuzenduta daude, ikus-entzuleen esperientzia, hezkuntza estrategiak eta gizarte-erantzukizun berritzailea nabarmentzen dituzten proiektuak saritzeko helburuarekin.