Etxea(e)ko Euskararen

SD EIBAR-en prentsa aretoan egingo dute Euskararen sozializazioa eta transmisioa izeneko jardunaldiaren XV. mintegia, eta kitto euskara elkarteak antolatuta.

Antolatzaileak berak bere webgunean jaso duenez, “transmisioak gaitasuna ezezik, hizkuntzarekiko baloreak eta ardura ere dakartza. Gure ondorengoei eta ingurukoei ematen diegunean hizkuntza horrekiko begirunea erakusten diegu, balekoa dela esaten ari gara eta eurona ere badela adierazten diegu. Gai hau hain garrantzitsua izanik, ezinbestekoa da alor hau aintzat hartzea, modu estrategikoan lantzea eta plangitzak definitzea. Asko gara honen gainean lanean dihardugun euskara elkarte, instituzio, aisialdi talde, irakasle edota guraso elkarteak. Gaiaren inguruan adituak eta puntako hizlariak ekartzeaz gain, gaia askotariko ikuspegitik lantzen saiatzen gara, askotariko estrategia eta plangintza koordinatuen beharra dagoela uste dugulako”.

Jardunaldiaren egitaraua:

08:45: Materiala jaso.

08:55: Ongietorria eta agurra.

09:10: Jendaurrean.eus erakundeek euskaraz komunikatzeko gida.

Asier Basurto Arruti, Soziolinguistika Klusterra.

10:00: Euskararen aukerak eta erronkak adimen artifizialaren garaian.

Aitzol Astigarraga Pagoaga, Orai NLP zentroko koordinatzailea.

10:50: Giza baliabideen kudeaketa euskararen normalizazioaren sektorean:

talentoaren atxikipena eta pertsonen motibazioa.

Arrate Illaro Etxeberria, Hizkuntza normalkuntzako teknikaria.

11:40: ATSEDENALDIA (ARGAZKIA ETA GOSARIA).

12:20: Kirolean eta kulturan, zer?

12:25: Euskararen ibilbidea SD Eibar-en. SD Eibarko ordezkariak.

12:50: Urak eginen du bide.

Alex Aginagalde Lopez, Pantailak Euskaraz-eko bozeramailea.

13:40 Hausnarketa-dinamika.

13:55 Amaiera eta agurra.

Informazio gehiago, hemen.

Bizenta Mogel, emakume aitzindaria lelopean egino dira aurtengo Bilbo Zaharra Forumeko jardunaldiak martxoaren 5ean eta 6an.

Martxoaren 5ean, hain zuzen, hitzaldia izango da, Yolanda Arrieta eta Josune Muñozen eskutik. Martxoaren 6an, halaber, emanaldi musikala izango da: Itxaro Borda eta Ibon Rodriguez. Ekitaldiak 19:00etan hasiko dira, Euskaltzaindiaren egoitzan.

Wikipediaren arabera, Bizenta Antonia Mogel Elgezabal (Azkoitia, Gipuzkoa, 1782ko ekainaren 6a – Abando, Bizkaia, 1854ko irailaren 29a) euskal idazlea izan zen. Osaba Joan Antonio Mogelek ikasketak eman zizkion etxean. Horri esker, garai hartako emakume batentzat erabat ohiz kanpokoa zen hezkuntza akademikoa lortu zuen. Ipui onac izenburuko alegia-bilduma idatzi zuen, eta 1804an argitaratu.

Informazio gehiago, hemen.

Martxoaren 7tik apirilaren 11ra egingo da Laburbira, zeinak euskaraz filmatutako zortzi film labur bilduko dituen. Martxoaren 6an Donostian egingo den aurrestreinaldiarekin batera hasiko da aurtengo zirkuitua, San Telmo Museoan, 18:30ean. Aurtengoa XXII. edizioa izango da.

Irudieneak jakinarazi duenez, besteak beste, ondoko filmak pantailaratuko dituzte: “Goya sarietarako hautatutako filmak (Ekain Irigorienen Europa eta Eneko Sagardoyren Betiko Gaua), Alaia Martin, Gipuzkoako Bertsolari finaleko irabazleak Karmele Mitxelena eta Iraitz Mateorekin batera zuzendutako Pentsatzen dut, Itziar Ituño protagonista duen Prosopagnosia edo Utlandsk Huezinema jaialdiko lan irabazlea.

Informazio gehiago, hemen.

Errenterian Hizkuntza Berrikuntza Laborategiak jakinarazi duenez, Etorkisuneku 01 erakusketak “etorkizuneko euskararen agertoki berriak irudikatu eta horien inguruan hausnartu ahal izateko hiru artelan eta soinu-instalakuntza bat biltzen ditu”.

Erakusketa izen bereko bekatik abiatu da, eta Nora Goyalde, Iraitz Mateo eta Naiara de la Puente artistek parte hartu dute.

Erakusketa ikusgai dago ekainaren 15era arte, eta bestelako jarduerekin osatuko da. Esaterako, martxoaren 14an, Hizkuntzari eta komunitateari lotutako iruditeria eta diskurtsoak berritzeko proposamen bat izenburuko jardunaldia antolatu dute.

“(…) abian da Etorkisuneku 01 instalakuntza. Prototipoen museo bat da, erdigunean jartzen dituena artefaktu material desberdinak. Honi lotutako programa publikoak balio behar du bestelako iruditeri bat probokatzeko, diskurtsoak elikatzeko, elkarrizketa kolektibo bat sustatzeko.  Proposatzen den jardunaldi honek balio digu horri guztiari markoa jartzeko. Arituko gara utopiez, zientzia fikzioaz, plausibilitateaz. Eszenatoki desberdinak bisitatuko ditugu, eta jolastuko dugu, eta aztarna utziko”.

Alba Garmendia, Arrate Hidalgo, Helen Torres, Elisabeth Roselló, Ane Abarrategi, Mikel Alvarez, Maite Darceles, Mikel Ayllon, Garazi Albizua, Ulu Media, Ines Osinaga eta Mikel Unamuno dira egitarauan jasotzen diren izenak.

Jardunaldiari buruzko informazio guztia, hemen.

Erakusketaren apailatzaileak bisita gidatu bi eskaini zituen, atzo, Iruñeko Hizkuntza Eskola Ofizialean.

Baliagarriak bezain emankorrak. Halakoxeak izan dira Gorka Arresek Iruñeko Hizkuntza Ofizialean eskainitako bisita gidatuak. Liburuaren Arbolaren apailatzaileak erakusketara bertaraturikoen interesa piztu zuen atzo, jardunaldi bitan. Goizeko saioan, Hizkuntza Eskolako C1 eta C2 mailetako euskara ikasleek parte hartu zuten. Arratsaldekoan, berriz, askotariko herritarrak batu ziren, tartean, Karrikiri euskara elkarteko kideak, literaturazaleak, Hizkuntza Eskolako irakasleak zein ikasleak, idazleak, baita instituzio publikoetako ordezkariak ere. Azken hauen artean egon zen, halaber, Jabi Arakama, Euskarabideko zuzendaria. Denek ala denek Arreseren azalpenez eta liburuaren ezaugarriez, haren anatomiaz, funtsean, literatura euskarriaren magiaz, gozatu zuten.

Karrikiriri gorazarre

Liburuaren Arbola Karrikiri euskara elkartearen bultzadaz eta Hizkuntza Eskola Ofizialeko kideen laguntzarekin joan da Euskararen Etxetik Nafarroako hiriburura. Gorka Arresek euskara elkarteko kideak izan zituen ahotan, eta gogoratu zuen elkartearen denda dela Euskal Herrian euskara hutsezko liburuak soilik saltzen dituen denda bakarra.

Literaturazaleek eta liburuzaleek urtarrilaren 23ra arteko epea izango dute Liburuaren Arbolaz Iruñean gozatzeko. Bertan egongo da erakusketa, Hizkuntza Eskola Ofizialean.

Euskararen Etxeko kide eta Azkue Fundazioko arduradun Iurdana Acasuso Iruñeko Hizkuntza Eskola Ofizialean izan da gaur, Liburuaren Arbola erakusketa ibiltaria aurkezten. Aurkezpenean parte hartu dute, halaber, Iruñeko Hizkuntza Eskola Ofizialeko kideek eta Karrikiri euskara elkarteko kideek.

Liburuaren Arbolak Bizkaiko mugak gainditu ditu lehenengoz, eta Iruñean hartu du lur. Erakusketa urtarrilaren 23ra arte egongo da ikusgai Nafarroako hiriburuan, hango Hizkuntza Eskola Ofizialean. “Guretzat inportantea da Liburuaren Arbola Iruñean egotea”, azpimarratu du Iurdana Acasusok. “Izan ere, honako hau da Bizkaitik irteten dugun lehenengo aldia. Leiho berri bat ireki dugu Iruñean, leiho garrantzitsu bat, Euskararen Etxean egiten dugun lana zabaltzeko tartea eskaintzen digu-eta”, esan du.

Erakusketa Bizkaiko hainbat udalerritan egon da ikusgai orain arte. Alabaina, Iruñeko egonaldiari begira, eduki batzuk berritu dira, hala nola, euskara hutsezko liburuen kopuruari buruzko azalpenak eta liburu-azalen atala. Era berean, euskaraz kaleratutako azken hogei liburuen azalak ikusgai daude erakusketako paneletako batean. “Liburua elementu unibertsala da, baina erakusketa honekin, euskararen begietatik gerturatuko gara bertara, idazleengana, ekoizpen lanetara, interpretazioetara”. Gonbita egina dago, beraz. Iruindarrek eta inguruko herritarrek 09:00 – 14:00 / 16:00 – 20:00 ordutegian bisitatu ahalko dute Liburuaren Arbola.

Bisita gidatua ere bai

Liburuaren Arbola Gorka Arresek apailatu du. Hori dela eta, kazetari eta editore ohiak bisita gidatua eskainiko du urtarrilaren 20an, 17:30ean. Bisita debalde eskainiko da. Interesdunek Karrikiri elkartearen dendan eman beharko dute izena. (Xabier karrika, 4 – Iruñeko alde zaharra)

Erakusketak bere lehenengo aldia du Nafarroan; hiriburuko Hizkuntza Eskola Ofizialeko areto nagusian egongo da ikusgai, urtarrilaren 13tik 23ra. Erakusketa Gorka Arresek ondu du; sortzaileak bisita gidatua eskainiko du urtarrilaren 20an, 17:30ean.

Euskararen Etxeak eta Gorka Arresek ondutako Liburuaren Arbola erakusketa ibiltaria Nafarroan izango da lehenengo aldiz, datorren astelehenetik aurrera. Erakusketa Iruñeko Hizkuntza Eskola Ofizialeko areto nagusian egongo da, eta urtarrilaren 13an zabalduko ditu ateak, 16:00etatik 20:00etara. Hortik aurrera, urtarrilaren 14tik 23ra arte, goiz eta arratsalde egongo da irekita, honako ordutegi honekin: 09:00 – 14:00 / 16:00 – 20:00.

Erakusketaren azalpena:

Historiako lehen hedabide masiboa da liburua: aurreneko objektu industriala. Liburua inprimategian saldoka egiteari esker mundua bizkor aldatzen hasi zen XV. mendetik aurrera. Liburuetan esperientziak eta jakintzak elkarrekin trukatuz eta itzuliz, era askotako aurrerapenak egin ziren denbora laburrean.

Liburuaren Arbola erakusketak liburuaren izaera azalduko du: hizkia, idazketa, diseinua, inprimaketa. Bisitariak ezagutuko du hizkiek nolako anatomia daukaten, testuek nolako formak hartzen dituzten, liburuak zein parte dauzkan eta nola izendatzen ditugun euskaraz.

Zuhaitz baten modukoa da liburua. Arnasa ematen du: babesa eta itzala, edertasunaren plazera eta argiaren sintesia. Liburuak zure jakin mina, pentsamenduak eta hizkuntza oxigenatzen ditu. Liburua zabaldutakoan, besarkatu egiten zaitu: zure irudimena eta inteligentzia kilikatzen ditu. Abentura bat da irakurtzea, desiraren eta askatasunaren lurralde zirraragarrietan barrena.

Erakusketaren helburuak:

• Liburua berez zer den ezagutzea, ulertzea eta bere garrantzia azpimarratzea.
• Liburuaren zati nagusiak identifikatzea: letraren anatomia, testuaren fisiologia eta liburuaren biologia.
• Liburuan parte hartzen duten eragileak aztertzea: idazlea, editorea, irakurlea, inprimategia.
• Euskal literaturara eta liburugintzara gerturatzea.

Erakusketaren apailatzailea:

Gorka Arrese (Zarautz, 1965) kazetaria eta argitaratzailea da. Argia, Egin, Euskaldunon Egunkaria eta Berria agerkarietan lan egin zuen. Hogeita hamar urtez Susa literatura argitaletxeko editorea izan zen, 1988tik 2018ra arte. Euskal idazle askoren lehenbiziko liburuak argitaratu ditu, hala nola Harkaitz Cano, Eider Rodriguez, Kirmen Uribe, Jon Alonso, Miren Agur Meabe, Lutxo Egia, Igor Estankona, Jon Benito, Leire Bilbao, Iñigo Astiz, Jule Goikoetxea, Beñat Sarasola eta abar. Literaturaren historiari buruzko perspektiba osoago bat izaten lagundu dio Armiarma.eus ataria osatzen jarduteak.